UROQBOYEV DILMUROD ABDUSATTAROVICH

Uroqboyev Dilmurod Abdusattarovich 1986-yil 16-iyun kuni Samarqand viloyati Jomboy tumanida o‘qituvchilar oilasida tug‘ilgan. 

         Otasi musiqa o‘qituvchisi bo‘lib, farzandining yoshligidanoq musiqaga bo‘lgan qiziqishi sababli to‘rt yoshidan boshlab musiqa sirlaridan saboq bera boshlagan. Ilk saboqlarini kichik-kichik qo‘shiqlardan, keyinchalik yeti yoshidan boshlab rubob, doira fortepiano cholg‘ularini chalishni o‘rgata boshlagan. Bundan tashqari to‘rt yoshligi paytida otasi  piyolalardan kuy yaratib, farzandiga o‘rgata boshlagan. Ushbu yangilik tez orada tuman madaniyat uyida, so‘ngra viloyat tadbirlarida namoyish etilib,  Madaniyat boshqarmasi boshlig‘i va viloyat Hokimi tomonidan yuqori baholangan.

         1993-yil yeti yoshlik paytida, Madaniyat boshqarmasi tashabbusi bilan, zarbli cholg‘ular ansambli (doira, qayroq tosh, kosa, qoshiq, qozon-tovoq, keli va shunga o‘xshash turli-xil uy-ro‘zg‘or buyumlari) tuzilib, Rossiya federatsiyasi Moskva shahrida bo‘lib o‘tgan xalqaro ansambllar ko‘rik tanlovida ishtirok etib, faxrli o‘rinlarni egallagan.

         Musiqa maktabda ushbu cholg‘ulardan tashqari g‘ijjak cholg‘usini ham o‘rganib, 2002-yil Jomboy tumanidagi 51-sonli umumiy o‘rtata’lim maktabining 9-sinfini tamomlab, Hoji Abdulaziz Abdurasulov nomidagi Samarqand san’at kollejiga g‘ijjak mutaxassisligi bo‘yicha o‘qishga qabul qilingan. 2005-yil kollejni a’lo baholar bilan bitirgan.

2005-2007 yillar davomida Jomboy tumani 19-son bolalar musiqa va san’at  maktabida g‘ijjak sinfi o‘qituvchisi vazifasida ishlagan, va 2007-yil Abdulla Qodiriy nomidagi Toshkent Davlat Madaniyat institutiga o‘qishga qabul qilingan. O‘qish mobaynida “Fayzinur” ko‘p ovozli aralash tarkibdagi talabalar ansambliga yetakchilik qilgan. Hamda ushbu ansambl bilan ko‘plab ko‘rik-tanlovlar, turli-xil konsert tadbirlarida faol ishtirok etgan.

2010-yil sakkiz nafar talabalar bilan birgalikda “Fayzinur” nomli ko‘p ovozli ansambllar uchun to‘plam kitobi chop etilgan.

2011-yil institutni imtiyozli tamomlab, Jomboy tumani 10-son bolalar musiqa va san’at maktabiga o‘qituvchi vazifasiga ishga qabul qilingan, va shu o‘quv yilining aprel oyidan o‘quv-ma’rifiy ishlar bo‘yicha direktor o‘rinbosari lavozimida faoliyatini davom ettirgan. Direktor o‘rinbosari vazifasi bilan bir qatorda maktabda xalq cholg‘ulari orkestri tashkil qilib, orkestr ijrosida o‘ttizdan ziyod asarlarni mohirona ijro etgan.

Tumandagi ko‘plab mahallalarda, tuman miqyosidagi davlat tadbirlarida, viloyat miqyosidagi davlat tadbirlarida orkestr jamoasi bilan faol ishtirok engan. Bulardan tashqari tumanda o‘tkazilgan barcha konsert tadbirlarda skripka cholg‘usida sozandalar ansambliga rahbarlik qilgan.

2019-yil o‘z xohishi bilan direktor o‘rinbosari lavozimidan bo‘shab, o‘qituvchi vazifasida ishini davom ettirgan.

2020-2022 yillari 19-son bolalar musiqa va san’at maktabida o‘quv-ma’rifiy ishlar bo‘yicha direktor o‘rinbosari lavozimida ishlagan.

2022-2024 yillari bulung‘ur tumani 9-son bolalar musiqa va san’at maktabida o‘qituvchi vazifasida ishlagan.

2025-yildan hozirgi kunga qadar 19-son bolalar musiqa va san’at maktabida o‘quv-ma’rifiy ishlar bo‘yicha direktor o‘rinbosari lavozimida ishlab kelmoqda.

Ish faoliyati davomida ko‘plab respublika va xalqaro tanlovlarda, festivallarda o‘quvchilari lauriyat sohibi bo‘lib, faxirli o‘rinlarni qo‘lga kiritib kelgan. Jumladan “M.Qori-Yoqubov”  respublika tanlovi, “Ona yurt ohanglari”  xalqaro  tanlovi, “Yagonasan muqaddas Vatan” viloyat tanlovi, “Navro‘z sadolari” ko‘p ovozli ansambl va orkestrlari xalqaro festivali, “Kamalak yulduzlari” bolalar ijodiyoti respublika festivali va b.

Shu bilan birgalikda o‘quvchi yoshlarning estetik didini boyitib, ularga jaxon klassik asarlari, hamda o‘zbek milliy mumtoz asarlarini o‘rgatib kelmoqda.

Hozirgi kunda oily toifali o‘qituvchi.